[Q4] Patalastas at Usapan: Ang Gamit ng Iba't ibang Bahagi ng Pananalita
Patalastas at Usapan: Ang Gamit ng
Iba't ibang Bahagi ng Pananalita
By: PJ MIANA
MELC: Nakagagawa ng patalastas at
usapan gamit ang iba’t ibang bahagi ng pananalita
Ang wika ay isang mahalagang kasangkapan sa
pakikipagtalastasan at pagpapahayag ng ating mga kaisipan at damdamin. Sa
pamamagitan ng wastong paggamit ng iba't ibang bahagi ng pananalita, tulad ng
pangngalan, pandiwa, pang-uri, atbp., nagagawa nating maipahayag ang ating mga
ideya at makipag-ugnayan sa iba.
Pangngalan (Noun)
Ang pangngalan ay mga salitang tumutukoy sa mga tao, bagay,
lugar, hayop, kaisipan, o konsepto. Sa paggamit ng mga pangngalan,
maipapakilala natin ang mga elemento na pinag-uusapan natin. Halimbawa, sa
pangungusap na "Ang puno ay luntian," ang "puno" ay isang
pangngalan na nagpapahayag ng isang bagay o elemento sa ating paligid.
Pandiwa (Verb)
Ang pandiwa naman ay mga salitang nagpapakita ng kilos o
aksyon. Ito ang naglalarawan ng mga gawain na ginagawa ng mga pangngalan.
Halimbawa, sa pangungusap na "Naglalakad si Juan sa kalsada," ang
"naglalakad" ay isang pandiwa na nagpapahayag ng kilos o galaw na
ginagawa ni Juan.
Pang-uri
(Adjective)
Ang pang-uri ay mga salitang nagbibigay ng katangian o
paglalarawan sa mga pangngalan. Ito ay nagdadagdag ng kulay at detalye sa
paglalarawan ng isang bagay o elemento. Halimbawa, sa pangungusap na "Ang
bulaklak ay maganda," ang "maganda" ay isang pang-uri na
nagbibigay ng paglalarawan sa bulaklak.
Pang-abay (Adverb)
Ang pang-abay naman ay mga salitang nagbibigay ng dagdag na
impormasyon tungkol sa pandiwa, pang-uri, o kapwa pang-abay. Ito ay
nagpapahayag ng panahon, lugar, paraan, layon, at iba pa. Halimbawa, sa
pangungusap na "Dahan-dahang lumalakad si Maria," ang
"dahan-dahan" ay isang pang-abay na nagpapahiwatig ng paraan ng
paglalakad ni Maria.
Pang-ugnay (Conjunction)
Ang pang-ugnay ay mga salitang ginagamit upang pag-isahin
ang mga salita, parirala, o sugnay. Ito ay nagpapakita ng ugnayan o relasyon sa
pagitan ng mga bahagi ng pangungusap. Halimbawa, sa pangungusap na "Si
Juan at si Maria ay magkaibigan," ang "at" ay isang pang-ugnay
na nag-uugnay sa dalawang pangngalan na "Juan" at "Maria."
Sa pag-unlad ng ating kaalaman sa mga bahagi ng pananalita,
mas nauunawaan natin kung paano magamit ang wika nang wasto at epektibo. Sa
pamamagitan ng tamang paggamit ng mga ito, nagiging mas malinaw at mas
komprehensibo ang ating mga pahayag at talastasan. Ang pag-unawa sa paggamit ng
mga bahagi ng pananalita ay isang mahalagang hakbang sa pagiging mahusay na
tagapagpahayag at tagapakinig.
PERFORMANCE OUTPUT NO. 1 – Paggawa ng Patalastas
Gumawa ng isang patalastas gamit ang mga mga bahagi ng
pananalita na iyong napag-aralan. Maaari mo itong isagawa sa pamamagitan ng
(mamili lamang sa dalawa):
A. Comic Strip – Gumuhit ng isang comic trip na
naglalarawan ng mga taong nag-uusap. Maari mo itong gawin sa bond paper o gawin
sa iyong cellphone bilang digital drawing. Matapos itong gawin ay isend sa
iyong guro gamit ang Messenger
B. Video – Gumawa ng sariling patalastas na
ipinupromote ang mga produktong nais mo. Ang patalastas ay dapat may haba
lamang na 10 segundo. Isend ito sa iyong guro via Messenger pag tapos na. Maari
mong i-edit ang video bago mo ito isend.
Deadline: April 19, 2024 at 5:00 PM
Comments
Post a Comment